МАСЪАЛАҲОИ ИЛМҲОИ ГУМАНИТАРӢ

Маҷаллаи «Масъалаҳои илмҳои гуманитарӣ» соли 2019 таъсис ёфтааст.

Маҷалла аз тарафи Вазорати фарҳанги Ҷумҳурии Тоҷикистоназ 24 июли 2019 таҳти рақами №137/мҷ – 97 ба қайд гирифта шудааст.

           

 

ОИННОМАИ

МАҶАЛЛАИ

 “МАСЪАЛАҲОИ ИЛМҲОИ ГУМАНИТАРӢ” 

 

1. Муқаррароти умумӣ 

1.1. Маҷаллаи “Масъалаҳои илмҳои гуманитарӣ” (минбаъд – “Маҷалла”) мувофиқи Кодекси граждании Ҷумҳурии Тоҷикистон, Қонуни Ҷумҳурии Тоҷикистон “Дар бораи матбуоти даврӣ ва дигар воситаҳои ахбори омма”, Қонуни Ҷумҳурии Тоҷикистон “Дар бораи табъу нашр” ва дар асоси қарори Муассис аз 04 апрели соли 2019 (Фармоиши № 3) таъсис дода шудааст.

1.2. Муассиси Маҷалла (минбаъд – “Муассис”) Институти илмҳои гуманитарии ба номи академик Б.Искандарови Академияи илмҳои Ҷумҳурии Тоҷикистон, ки бо қарори Раёсати Академияи илмҳои Ҷумҳурии Тоҷикистон аз 9 сентябри соли 1991 № 147 “Дар бораи таҳсиси Институти илмҳои гуманитарӣ” таҳсис дода шудааст, мебошад.

1.3. Маҷалла аз рӯзи бақайдгирии давлатии он ташкилшуда ба ҳисоб рафта, фаъолияташро мувофиқи қонунгузории Ҷумҳурии Тоҷикистон, фармоишҳои Муассис ва ҳамин Оиннома ба амал мебарорад, инчунин ҳуқуқ пайдо мекунад, ки аз номи худ шартномаҳо имзо кунад, дорои ҳуқуқҳои молумулкӣ ва шахсии ғайримолумулкӣ гардад, дар мурофиаҳои гражданӣ иштирок намояд.

1.4. Маҷалла барои мусоидат ба пешрафти илмҳои филология, таърих ва фалсафаву иқтисодиёт, таблиғи дастовардҳои олимони Тоҷикистон дар соҳаҳои забоншиносӣ, таърих, мардумшиносӣ, бостоншиносӣ, фалсафа, фолклор, адабиёт ва иқтисодиёт саҳми худро мегузорад. Маҷалла барои кормандони илмӣ, муҳаққиқон, устодону донишҷӯёни факултаҳои филология, таъриху фалсафа ва иқтисодиёт  ва ҳамчунин марказҳои таҳқиқии тоҷикшиносӣ ва шарқшиносии байналмилалӣ таъйин шудааст.

1.5. Маводди маҷалла бо забонҳои тоҷикӣ, русӣ ва англисӣ нашр мешавад.

1.6. Маҷалла ҳар сол 4 шумора (дар се моҳ як маротиба) дар           формати А4, дар ҳаҷми 11 ҷузъи чопӣ нашр мешавад. Интихоби мақолаҳои муаллифон барои чоп дар маҷалла мутобиқи дастури “Қоидаҳо барои муаллифон”, ки дар маҷалла чоп карда мешавад, сурат мегирад. Маҷалла номи доимии худ ва ороиши мутобиқи бадеӣ ва графикии худ дорад. Маҷалла мутобиқи дархости муштариён ва дархости якдафъаинаи муассисаҳо ва шахсони алоҳида паҳн карда мешавад.

1.7. Ношири маҷалла Институти илмҳои гуманитарии ба номи академик Б.Искандарови Академияи миллии илмҳои Тоҷикистон мебошад. Иҷрои вазифаҳои ба маҷалла гузошташуда аз тарафи ҳайати таҳририя таъмин карда мешавад. Институти илмҳои гуманитарии ба номи академик Б.Искандаров таҳрир, ороиш ва чопи маҷалларо ба роҳ мемонад.

1.8. Масъалаҳои чопи маҷалла ва қатъи чопи он, таҷдиди ташкил, тағйири ном, давраи чоп, ҳаҷм, арзиш, фонди моҳонаи музди кормандони асосии ҳайати таҳририя аз тарафи маъмурияти Институти илмҳои гуманитарии ба номи академик Б.Искандарови АМИТ ҳал карда мешавад.

1.9. Номи пурраи Маҷалла:

– ба забони тоҷикӣ:  Маҷаллаи “Масъалаҳои илмҳои гуманитарӣ”;

– ба забони русӣ:  Журнал “Вопросы гуманитарных наук”;

– ба забони англисӣ: Journal “Issues of Humanitarian Sciences”.

1.10. Суроғаи ҳуқуқии (макони ҷойгиршавии) редаксияи Маҷалла: Ҷумҳурии Тоҷикистон, шаҳри Хоруғ, кӯчаи У. Холдорова, 4; телефон: (992) 93 489 2626; (992) 93 597 11 76; (992) 93 535 31 68.

 

2. Роҳбарии маҷалла

         2.1. Институти илмҳои гуманитарии ба номи академик Б.Искандарови АМИТ самти мавзӯии маҷалларо мутобиқи тартиби муқарраршуда муайян мекунад, ба ҳайати таҳририя дар фаъолияти амалии он мусоидат менамояд.

         2.2. Раёсати АМИТ бо тартиби муқарраршуда сармуҳаррири маҷалла, муовини сармуҳаррир, котиби масъул ва ҳайати таҳририяро тасдиқ менамояд.

         2.3. Институти илмҳои гуманитарии ба номи академик Б.Искандарови АМИТ бо пешниҳоди сармуҳаррир масъалаҳои тағйири сохтор ва ҳайати кормандонро баррасӣ мекунад.

         2.4. Институти илмҳои гуманитарии ба номи академик Б.Искандарови АМИТ:

         – гузоришҳои ҳайати таҳририяро баррасӣ намуда, барои беҳсозии фаъолияти он иқдомҳои лозимро анҷом медиҳад;

         – чопи саривақтии маҷалла ва сифати иҷрои полиграфии онро назорат карда, барои кори муназзами нашриёт ва матбаа чораҳои зарурӣ меандешад;

         – пардохти саривақтии чопи маҷалларо ба уҳда мегирад;

         – натиҷаи фаъолияти ҳайати таҳририяи маҷалларо арзёбӣ мекунад;

         – бо пешниҳоди сармуҳаррир кормандони маҷалла барои дастовардҳои мушаххас дар кори эҷодӣ ва ташкилӣ тақдир карда мешаванд.

 

3. Вазифаҳои ҳайати таҳририяи маҷалла

3.1. Ҳайати таҳририя аз ҷумлаи мутахассисони пешбар ташкил меёбад, ки барои иҷрои бомуваффақияти вазифаҳои маҷалла заруранд.

3.2. Ҳайати таҳририя сатҳи баланди илмии мақолаҳо ва таҳияи саривақтии шумораҳои маҷалларо барои пешниҳоди онҳо мутобиқи нақша ба нашриёт, тақризнависӣ ва таҳрири илмии мақолаҳои дар маҷалла чопшаванда ва кор бо муаллифонро таъмин менамояд.

3.3. Ҳайати таҳририя бо пешниҳоди сармуҳаррир дар ҳолати аҳаммияти махсуси мақолаҳо ё ба манзури интихоби мавзӯии мавод барои шумораи навбатии маҷалла метавонад дар тартиби навбати чопи мақолаҳо тағйир ворид намояд.

3.4. Ҳайати таҳририя ва нашриёт уҳдадор мешаванд, ки ҷадвали истеҳсолии маҷалларо риоят намоянд.

3.5. Ҳайати таҳририя мақоми роҳбарии гурӯҳӣ ба шумор меравад. Ба ҳайати он сармуҳаррир, муовини сармуҳаррир, котиби масъул, аъзои ҳайати таҳририя мутобиқи тахассуси маҷалла дохил мешаванд. Ҳайати таҳририя ба таври давраӣ на камтар аз як бор дар панҷ сол аз тарафи Раёсати АИ ҶТ  тасдиқ карда мешаванд.

3.6. Сармуҳаррири маҷалла дар мавриди мазмуни маҷалла, сатҳи илмии он масъулияти шахсӣ дорад. Сармуҳаррир роҳбарии илмӣ ва ташкилиро анҷом медиҳад; истифодаи воситаҳо ба ниёзҳои ташкилиро танзим мекунад; шумораи маҷалларо барои ҳуруфчинӣ, чоп ва интишор имзо мекунад; ҳайати таҳририяи маҷалларо дар мақомоти давлатӣ ва муассисаҳо муаррифӣ мекунад.

3.7. Муовини сармуҳаррир таҳрири илмии мақолаҳо ва интихоби онҳоро барои шумораи навбатии маҷалла назорат мекунад; мутобиқати шумораи маҷалларо ба дастнависи муаллиф муқоиса карда, сифати нашрияро назорат мекунад.

3.8. Аъзои ҳайати таҳририя тақризнависии илмӣ ва таҳрири мақолотро тибқи фаслҳои маҷалла анҷом медиҳанд, ки ба онҳо вобаста карда шудаанд ва бахши марбути худро ба маҷлисҳои ҳайати таҳририя пешниҳод менамоянд.

3.9. Котиби масъул мақолаҳоро аз муаллифон қабул мекунад; тартиби баррасии мақолаҳоро ба аъзои ҳайати таҳририя таъмин менамояд, шумораҳои маҷалларо дастабандӣ мекунад, маҷлиси ҳайати таҳририяро омода месозад ва протоколи ин маҷлисҳоро таҳия месозад; дастхатти шумораҳои дастабандишударо ба нашриёт месупорад; муҳлати чоп ва ғалатгирии маҷалларо назорат мекунад; бо муаллифон, муқарризон, хонандагон ва муштариён мукотиба мекунад.

3.10. Маҷлиси ҳайати таҳририя тибқи зарурат баргузор карда мешаванд. Аъзои ҳайати таҳририя бояд на камтар аз се рӯз пеш аз ҷаласа аз тарафи котиби масъул дар бораи баргузории ҷаласа ва рӯзномаи он огоҳ карда шаванд.

3.11. Ҳайати таҳририя ҳуқуқ дорад:

– мақолаҳоеро, ки барои чоп муносиб нестанд, аз нашр боз дорад;

– мақолаҳоро барои ислоҳ мутобиқи дастури муҳаррир баргардонад;

– ҳангоми зуҳури ихтилофи назар дар арзёбии мақола дар байни аъзои ҳайати таҳририя мувофиқи салоҳдиди ҳайати таҳририя он барои тақризи берунӣ фиристода мешавад;

– бо ризоят ва ҳамоҳангии муаллиф дастхатро кӯтоҳ кунад ва ё тағйирот ворид намояд;

– дар ҳолати ба идораи маҷалла ворид шудани ариза аз хонандагон дар бораи он, ки муаллифи мақолаи чопшуда ба иштибоҳ роҳ додааст, ки ба мазмуни илмӣ, таҳрифи гуфтаҳои муаллифони дигар ё изҳороте марбут аст, ки ҳаққи таълифи муаллифони дигарро вайрон мекунанд, ҳайати таҳририя ҳақ дорад, ки ин эродҳоро чоп намояд; ба муаллифи мақола, ки ба нишонии вай чунин эродҳо омадаанд, ҳақ дода мешавад, ки ба эродҳои чопшуда дар саҳифаҳои маҷалла ҷавоб нависад.  

 

 

4. Ҳолати ҳуқуқии Маҷалла

4.1. Маҷалла ҳуқуқ дорад, ки аз ҳисоби фурӯши маҷаллааш маблағҳои муайян ба даст орад, ки ин маблағҳо барои иҷрои мақсадҳои Оинномавии Маҷалла равона мешаванд.

4.2. Маҷалла ҳуқуқи истифодабарии қарзҳои бонкиро доро аст.

4.3. Маҷалла дорои дигар гуна ҳуқуқҳо, ки бо қонунгузории Ҷумҳурии Тоҷикистон барои муассисаҳои ғайритиҷоратӣ муайян карда шудаанд, мебошад.

4.4. Маҷалла аз рӯи уҳдадориҳои худ бо маблағи пулие, ки дар тавозуни мустақили худ дорад, ҷавобгар мебошад.

 

5. Мақсад ва намудҳои фаъолияти Маҷалла

5.1. Маҷалла дар ҳудуди Ҷумҳурии Тоҷикистон ва берун аз он барои аҳли фарҳанг, кормандони илмӣ, донишҷӯёни мактабҳои олӣ ва доираи васеи хонандагон пешбинӣ шуда, инъикоси дастовардҳо ва муаммоҳои илмию фарҳангӣ ва иҷтимоию иқтисодиро дар назар дорад.

5.2. Мақсад ва вазифаҳои асосии Маҷалла аз инҳо иборат мебошанд:

– нашри ахбори дорои мазмуну мӯҳтавои илмӣ оиди масъалаҳои мубрами забоншиносӣ, вазъи иҷтимою иқтисодӣ ва ҷамъиятию фарҳангии ВМКБ ва ҷумҳурӣ дар байни аҳолӣ;

– инъикоси дастовардҳои илмию тадқиқотии олимони Тоҷикистон ва кишварҳои хориҷӣ;

– ҳамкорӣ бо созмонҳои ҷамъиятӣ ва ташкилотҳои расмӣ ҷиҳати таъмини интишори маҷалла;

– фаъолияти иттилоотиву таблиғотӣ.

5.3. Барои иҷрои вазифаҳои оинномавии худ Маҷалла метавонад:

– мизҳои мудаввар, лексияҳо ва семинарҳову барномаҳо гузаронида, фаъолияти хешро тарғиб намояд;

– маълумотҳои заруриро оид ба проблемаҳои самти фаъолияти Маҷалла интишор намояд.

 

6. Қатъ гардидани фаъолияти Маҷалла

6.1. Қатъ гардидани фаъолияти Маҷалла дар натиҷаи азнавташкилдиҳӣ ё барҳамдиҳии он рух медиҳад.

6.2. Азнавташкилдиҳии Маҷалла бо қарори Муассис мувофиқи Кодекси граждании Ҷумҳурии Тоҷикистон ба амал бароварда мешавад. Дар ҳолати азнавташкилдиҳии Маҷалла ҳамаи ҳуҷҷатҳо бо тартиби муайяншуда ба вориси ҳуқуқии он дода мешаванд.

6.3. Барҳамдиҳии Маҷалла дар ҳолатҳо ва тартибе, ки Кодекси граждании Ҷумҳурии Тоҷикистон муқаррар кардааст, ба амал бароварда мешавад.

6.4. Молумулке, ки баъд аз қонеъ гардонидани талаботҳои кредиторон, инчунин аз ҳисоби воситаҳои хусусӣ ба даст дароварда шудаанд, ба Муассис мегузарад.

 

7. Қабул ва тасдиқи Оиннома

7.1. Оинномаи Маҷалла ва дохил намудани тағйиру иловаҳо ба он аз тарафи Муассис тасдиқ карда мешавад.

7.2. Тағйиру иловаҳо ба Оинномаи мазкур аз тарафи Муассис дар сурати ба қонунгузории Ҷумҳурии Тоҷикистон мухолифат надоштани тағйиру иловаҳо дохил карда мешаванд.

7.3. Ҳамаи тағйиру иловаҳо ба Оинномаи мазкур тибқи тартиб ва дар мӯҳлати муқаррарнамудаи қонунгузории Ҷумҳурии Тоҷикистон ба қайди давлатӣ гирифта мешаванд ва аз вақти чунин бақайдгирӣ эътибори ҳуқуқӣ пайдо мекунанд.